Түркиядағы зілзала кезінде қаза тапқан тағы бір қазақстандықтың мәйіті елге жеткізілді. Марқұмның туыстары қираған ғимараттар астынан табылған талдықорғандық Жанар Жақсыбекова екенін растаған. Сондай-ақ, жойқын жер сілкінісі кезінде көз жұмған Мирболат Құрмашев пен Әділ Қадырбеков жер қойнына тапсырылды. (ПМ) Ал қазақстандық құтқарушылар бір аптадан бері Түркиядағы зілзала салдарымен күресуге ат салысып жатыр. Олар бүгінге дейін үйінділер астында қалған 7 адамды ажалдан арашалап үлгерген. Әрі бауырлас елге көмек беруге асыққан ағайын көп. Мәселен, қазір отандастырымыз Қахраманмараш өлкесінде киіз үй тігіп, қыс ортасы қақаған қара суықта далада қалған тұрғындарға баспана ұсынып жатыр.
Зілзаладан зардап шеккен ағайынға көмек көрсетуге асыққан қазақстандықтар Кахраманмарашқа да жетті. Қазір отандастарымыз жойқын жер сілкінісі салдарынан баспанасыз қалған тұрғындарға киіз үй тігіп беріп жатыр. Еріктілердің айтуларынша, алғашқы отыз үй «Kilavuzlu mesire alani» ұлттық паркіне тігіліп, Қазақстан халқының атынан ас берілмек. Ал киіз үйлердің 23-і - 12-16 қанатты ағаш үй болса, қалғаны - темірден жасалған екен.
НҰРБЕК БЕКБАУ, ерікті:
– Жалпы саны жүзге жуық киіз үй тігіледі. Барлығында қажетті кілем, өзге де жабдықтары толық алынған, жеткілікті. Қалғаны - темірден жасалған сүйекті үйлер. Темірге бекер таңдауымыз түскен жоқ. Біріншіден, арзан. Екіншіден, құралуы тез, 15 минутта 3-4 адам құрайды, байлап отырмайсың.
Сондай-ақ, қазір жойқын жер сілкінісі болған Түркияның кейбір аймақтарында іздестіру жұмысы тоқтатылып жатыр. Өйткені өзге мемлекеттерден көмекке келген құтқарушылар апат ошағында бұзақылардың көбейгенін айтып, шағымданған. Мәселен, израиль, неміс және австриялық құтқарушылар тонау мен атыс салдарынан апат ошағынан кетуге мәжбүр болыпты. Себебі қарақшылардың әрекеттері құтқарушылардың өміріне қауіп төндірген. Бірақ қазақстандық құтқарушылар апат аумағында қала бермек. Жауапты ведомство дерегінше, отандастырымыз өздері қызмет етіп жатқан аймақтарда бұзақыларды кездестірмеген.
ҚАҺАРМАН ОРАЗАЛИН, ҚР ТЖМ төтенше жағдайларды жою департаментінің бастығы:
– Қазіргі таңда 7 адам құтқарылды, 67 мәйіт шығарылды. Алпыстан астам зардап шеккендер мен науқастарға медициналық көмек көрсетілді. Жылыту пунктерінде 200-ден астам адам орналасты.
Қазірге дейін Түркияның құқық қорғау органдары 98 адамды қамауға алған. Anadolu агенттігінің мәліметінше, ұсталғандардың басым бөлігі бұзақылық және тонау деректері бойынша күдікке ілініпті. Десе де, құтқарушылар бір аптадан бері өмір мен өлімнің арасында қалған кісілерді аман алып қалудан аянып жатқан жоқ. Міне, сондай жүздеген тонна бетонның астында қалып, құтқарылған азаматтың бірі Әли. Ол бірнеше күннен бері жанын шүберекке түйіп отыр. Өйткені анасы мен әпкесі әлі де қирандылардың астында жатыр екен.
ӘЛИ, зілзала құрбаны:
– Мен қирандылар астынан 19 сағаттан кейін шықтым. Осы 19 сағат ішінде үш рет есімнен танып, талып қалдым. Мұндай жағдайлар болуы мүмкін ғой. Сосын біз менің әйелімді шығарып алдық.
Зілзаладан зардап шеккен ағайынға бірінші кезекте жылытқыштар мен көрпе-төсек керек. Түркияның бас консулдығының мәліметінше, шатырлар мен генераторлар да ең қажетті дүниелер қатарында болып отыр. Сондықтан көмек беруге ниетті қазақстандықтар осы заттарды алып, елшілікке жеткізіп бергені абзал.
Бізді әлеуметтік желіде оқыңыздар:
Youtube -[ Ссылка ]
Facebook - [ Ссылка ]
Instagram - [ Ссылка ]
Vkontakte - [ Ссылка ]
TikTok - www.tiktok.com/@informburo31
WhatsApp Информбюро +7 777 331 31 31
#News #Kazakhstan #Жаңалықтар #Біздіңжаңалықтар #Нашиновости #Сегодня #Қазақстан #31канал
