Бүгін таңғы сағат 5-терде елді мекен іргесіндегі өзен арнасынан асып, оған жақын 4 үйге су кіріп, маңайдағы 5-6 үйдің ауласын жайлаған.
Төтенше жағдайлар қызметінің мамандары мен жергілікті билік өкілдері апаттың зардабын жоюға күш салуда. Түнде өзен деңгейі көтеріле бергенде жағалауда тұратын 43 адам мен 150-ге жуық мал қауіпсіз жерге көшіріліпті.
Ал өзеннің арғы бетіндегі көшелердің тұрғындары үйлеріне қайықпен қатынауда. Себебі арадағы көпірді су шайған. 10 сәуірден бастап бұл аймақты арнайы техникалар мен құтқарушылар бақылауға алған.
Құралай Әзмағамбетова, Шағалалы ауылының тұрғыны:
-Мынадай су басу болған жоқ. Су әлі ағып келіп жатыр. Бүгін түнде не болатынын білмейміз.
Болат Дүйсенов, Шағалалы ауылдық округінің әкімі:
-Үйлеріне су кірген 4 отбасыға төленетін өтемақыға келер болсақ, біз қазір оларға келген шығын жайлы ақпарат жинап жатырмыз. Оған төтенше жағдай қызметінің де мәліметтерін қосып, барлығын ауданға өткіземіз. Кейін комиссия шешімімен олардың баспаналары қалыпқа келтіріледі.
