Мемлекеттік қызметкерлерге шет елдерде қандай шаралар қолданылатыны туралы қазір «Шартарап» айдарында да айтып береміз.
Жүргізуші
-Биыл доллар нығайып, құны еуромен теңесуі, тіпті одан да қымбаттай түсуі мүмкін деген жорамал бар. Ал бұл жаһан экономикасына қалай әсер етеді?
Зайнұр Байжігіт, тілші
-Бұған қатысты даниялық «Саксо банк» қаржыгерлері жағымсыз болжам айтты. Инвестициялық онлайн-банк сарапшылары: «Доллар нығайса, АҚШ экономикасы 25-40 пайызға құлдырайды», – дейді.
Доллар күшейсе, экономикасы АҚШ валютасының құнына тәуелді елдердің ірі банктерден алған қарызды қайтаруы қиындайды. «Ал мұның салдары Америка экономикасының құлдырауына әкелуі мүмкін», – дейді даниялық сарапшылар.
Халықаралық еңбек ұйымының болжамы да көңіл көншітпейді. Олардың мәліметінше, биыл әлемдегі жұмыссыздар саны артып, 201 миллионға жетуі мүмкін. Ал келер жылы олардың қатарын 3 миллиондай адам толықтыруы ықтимал. Өйткені қазір еңбекке жарамды жастағы халық санының өсу қарқыны жұмыс орындарының құрылуынан гөрі озып тұр. Бүгінде мұндай жағдай Батыс Еуропада анық байқалады.
Ал мемлекет ақшасын ұқыпсыз жұмсаймын деп австралиялық министр отставкаға кетті. Сьюзан Ли денсаулық сақтау және спорт саласына жауапты болған. Қызметтік іс-сапарлары кезінде ведомство басшысы жұмыспен емес, өзіне жылжымайтын мүлік іздеумен айналысқан. Ал барып-келгеніне бюджеттің ақшасын шығындаған. Министрдің қызметін асыра пайдаланғаны әшкере болған соң, отставкаға кетуін сұрайды.
Малколм Тернбулл, Австралия Премьер-Министрі
-Австралиялықтар саясаткерлерден салық төлеушілердің ақшасын тиімді әрі сауатты жұмсауын талап етуге құқылы. Біз мемлекеттің ақшасына ұқыппен қарауымыз керек.
Ал Ресей халқының тамақ ішу талғамы айтарлықтай өзгеруде. Бұрын ет пен балық және сүт өнімдерін көп тұтынатын жергілікті жұрт енді асқабақ пен картопқа көшіпті. Бұл – мемлекеттік статистика қызметінің ресми мәліметі. Мұның себебін анықтап көрген кейбір сарапшылар: «Халықтың салауатты өмір салтына ден қойғанын аңғарамыз», – деп пайымдаса, азық-түлік мәселесімен айналысатындар: «Көкөніс диетасы – бағалардың шарықтап, халық табысының қысқарғанын көрсетеді», – дейді. Мамандардың айтуынша, қымбатшылық одан әрі белең алса, көкөніс диетасына көшетін тұрғындардың саны арта түседі.
Александр Абрамов, экономика жоғары мектебінің профессоры
-Соңғы 3 жылдың ішінде Ресей халқының айлық табысы қысқарып, тұрғындар дастарханға арзан тағамдарды қоятын болды. Мәселен, былтыр сүт өнімдері 20 пайызға қымбаттаса, майдың бағасы 70 пайызға дейін өсті.
Роботтардың құқығы заңдастырылуы мүмкін. Қазір Еуропарламент осы бойынша заң жобасын қарауға кірісті. Тиісті құжат адам мен жасанды интеллект және роботтар арасындағы қатынасты реттейді. Егер заң қабылданса, құлтемірлер электронды тұлға мәртебесін алады. Робот құрастырушылар өздері жасап шығарған смарт техникаларына қатысты сақтандыру құжаттарын рәсімдеуге тиіс болады. Бұдан бөлек, кез келген уақытта оны сөндіріп тастайтын арнайы түймесі болуы міндеттелмек. Сондай-ақ мамандар өз өнімдерінің адамдарға физикалық, психологиялық зардап тигізбейтіні жөнінде кепіл беруі тиіс.
Жүргізуші
-Әлемдегі жұмыссыздар саны осы роботтардың кесірінен өсіп отырған жоқ па?
Зайнұр Байжігіт
-Қазір еуропарламент депутаттары жұмыс орындарына жаппай роботтардың тартылуынан адамдардың жұмыссыз қалу мүмкіндігін ескеріп, осы мәселені шешу жағын да ойластырып жатыр екен.
