Хас қыранды сынға салар, құсбегінің абыройын асырар бүркітшілік өнер ұрпақтан ұрпаққа жалғаса беретіні анық. Себебі ата-бабадан қалған саятшылық өнерге Қазақстанда жіті көңіл бөлініп келеді. Атырауда өткен «Қансонар-2017» республикалық құсбегілер сайысынан осындай ой түйдік.
Ақ қардың үстінде көсілген қырмызы түлкі қыранның ғана емес, күллі көрерменнің қанын қыздырғандай болды. Дегенмен құстың бәрі қыран емес. Жемін іле алмай адасып, қызылмай болып айнып кетіп жатқандар да кездесті. Бірақ тараздық құсбегі баптаған «Ботақара» атты бүркіті алтайы түлкінің адымын аштырмады.
Бауыржан Ешметов, бүркітші:
-Мен өзім бала күннен айналысамын. Атам да, әкем де құсбегі болған. Сол жалғасып келе жатыр. Осы жерде менің немерем, балам жүр. Осылай кете берсе, ұрпақ ұмытпайды деп ойлаймын.
Республикалық бүркітшіліер сайысына еліміздің 8 облысынан 20 бүркітші келді. Олар сайыстың шарты бойынша құсты қолға шақыру, еркін ұшыру, шырғаға шақыру секілді құсбегінің шеберлігін сынайтын шарттардан өтіп, бүгін саятшылықты бастады. Бір қуанарлығы бүркітшілік батыс өңірде де кең қанат жайып келеді екен.
Өнербек Жанбала, ҚР Ұлттық ойындар қауымдастығы облыстық филиалының төрағасы:
-Бізде бәйге, теңге алу, аударыспақ деген ұлттық ойындар бар ғой. Бізде кенжелеу қалған осы құсбегілік, сосын көкпар еді. Қазір осындай шаралар Қазақстанның барлық аймағында ұйымдастырылып жатыр.
Осылайша, мұнайлы өңірде қиқуға толтырған қансонар да мәреге жетті. Екі күнге созылған додада қыранына қасқыр ілдірген атыраулық Арман Қошқаровтың мерейі үстем болды. Қалған құсбегілер де өнеріне қарай марапатталып жатты. Бастысы, саятшылық өнерге шөлдеген жүздеген қандасымыз естен кетпестей әсер алды. Түз тағысын өзі ұстағандай шаттанған мына бүлдіршіндерден келешекте құладынға құс ілдірер Жалайыр Шора секілді құсбегі шығары анық.
Авторлары: Арыстанбек Кенже, Темірлан Сұлтағанзиев
