Azərbaycanın ilk prezidenti Ayaz Mütəllibovun həyat yoldaşı Adilə Mütəllibova
Adilə Mütəllibova 1938-ci ildə Bakı şəhərində anadan olub. Həyat yoldaşı ilə 1961-ci ildə Bakıda ailə qurub və Bakıda yaşayıblar. Azad və Zaur adlı övladları doğulub. Ayaz Mütəllibov 1992-ci ildə hakimiyyətdən gedəndən sonra Adilə Mütəllibova onunla birlikdə Moskvada yaşayır. 2011-ci ilin avqustunda oğlu Azad Mütəllibov vəfat edəndə, o da Ayaz Mütəllibovla birlikdə Bakıya gəlir. Mətbuatla ünsiyyət saxlamırdı.
Mütəllibova 5 iyul 2019-cu ildə uzun sürən xəstəlikdən sonra 81 yaşında vəfat edib. Onun dəfn mərasimi həmin gün Bakıda Təzə Pir məscidində keçirilib. Bakı Yasamal qəbiristanlığında oğlu Azadın yanında dəfn edilib.
Ayaz Mütəllibov prezident olduğu dövrdə Adilə Mütəllibova əsasən xeyriyyəçiliklə məşğul olub. Gəncliyində həkim işləyib. Ayaz Mütəllibov dövlət işinə keçəndən sonra işləməyib.
Azərbaycanın ikinci prezidenti Əbülfəz Əliyevin həyat yoldaşı Həlimə Əliyeva.
1952-ci ildə Naxçıvan Muxtar Respublikasının Ordubad Rayonunun Kələki Kəndində anadan olub.
Əbülfəz Elçibəy Həlimə xanımla 1979-cu ildə ailə həyatı qurub. Onların bir qızı, bir oğlu var.
Həlimə Əliyeva Elçibəyin prezidentliyi dövründə onun yanında görünmürdü. Səbəb həmin vaxt Həlimə Əliyevanın azyaşlı uşaqlarına baxması olub.
Həlimə Əliyeva 2019-cu il iyunun 14-ü 67 yaşında İstanbulda vəfat edib. Kələki kəndində dəfn olunub.
Azərbaycanın 3-cü prezidenti Heydər Əliyevin həyat yoldaşı Zərifə Əliyeva.
Zərifə Əliyeva 28 aprel 1923-cü ildə həkim Əziz Əliyev və Leyla Əliyevanın ailəsində dünyaya göz açıb. Həkimlər Tamerlan Əliyev, Cəmil Əliyevin və musiqiçi Gülarə Əliyevanın bacısı olan Zərifə Əliyeva 1942-ci ildə Azərbaycan Dövlət Tibb İnstitutunun müalicə-profilaktika fakültəsinə daxil olub. 1969-cu ildən Azərbaycan Həkimləri Təkmilləşdirmə İnstitutunda göz xəstəlikləri kafedrasının dosenti, professor, 1982–1985-ci illərdə görmə orqanlarının peşə patologiyası laboratoriyasının müdiri, oftalmologiya kafedrasının müdiri vəzifələrində çalışıb.
1954-cü ildə Heydər Əliyev ilə ailə qurub, 1955-ci il 18 oktyabrında ailələrində Sevil Əliyeva, 1961-ci il 24 dekabrında isə İlham Əliyev dünyaya gəlib.
1985-ci il aprelin 15-də Moskvada vəfat edən Zərifə Əliyevanın cənazəsi 1994-cü ildə Moskvanın Novo-Deviçye qəbiristanlığından Bakıya gətirilərək, Fəxri Xiyabanda, atasının qəbri yanında dəfn olunmuşdur.
Azərbaycanın 4-cü və hazırki prezidenti İlham Əliyevin həyat yoldaşı Mehriban Əliyeva
Əliyeva Mehriban Arif qızı 1964-cü il 26 avqustda Bakıda doğulub. Yazıçı, ədəbiyyatşünas, Mir Cəlal Paşayev və jurnalist, pedaqoq Nəsir İmanquliyevin nəvəsidir.
Atası Arif Paşayev fizika-riyaziyyat elmləri doktoru, professordur. 1996-cı ildən indiyədək "Azərbaycan Hava Yolları" Dövlət Konserni Milli Aviasiya Akademiyasının rektorudur. Anası Aida İmanquliyeva şərqşünas, ədəbiyyatşünas, tənqidçi, tərcüməçi, filologiya elmləri doktoru, professordur.
Mehriban Əliyeva 1982-ci ildə N. Nərimanov adına Azərbaycan Dövlət Tibb İnstitutunun müalicə-profilaktika fakültəsinə daxil olub. 1988-ci ildə Seçenov adına 1-ci Moskva Dövlət Tibb İnstitutunu bitirib və 1988–1992-ci illər ərzində Moskvada Göz Xəstəlikləri Elmi-Tədqiqat İnstitutunda işləyib.
21 fevral 2017-ci ildən Azərbaycan Respublikasının Birinci vitse-prezidenti, 10 may 2004-cü ildən Heydər Əliyev Fondunun Prezidenti, 5 mart 2021-ci ildən YAP sədrinin müavinidir.
Mehriban Əliyeva 1983-cü ildə İlham Əliyevlə ailə həyatı qurub. Leyla, Arzu və Heydər adlı övladları var.
